First the kynge oure sovereyne lorde writith oute lettris un to certeyne squyers of thus rewme and desirynge them for the make them redy for the receyve the hye and worshipfull ordir of knyghthode at hye at hye festis of the yere or at suche tyme as it likith the kynge for to desire them for to come.

The evyn of the day of the feste all the squyers that schall be made knyghtis they schall come all to gedir un to the kyngis Palys [and the marschall of yngland schall havce all ther horses and then the statis of the kyngis hous schall mete with them and brynge hem up in the kyngis presence, and then schall the kyngis sewer goo un to the kechyn for his mete and all the squyers wt him that schall be made knyghtis for eche on of them schall bere a disshe and they schall serve the kynge out of the firste course and when the kynge is servid then schall gentilmenusshers brynge hem all to gedir in ther chambir then they schall have ther service in to ther chambir and dyne alle to gedir and when they have dynid then schall the gentilmen usshere come in to the seyde Chambir and asyne evy squyer his plase for his bedde and for his bayne. And when the kynge hath dynid then schall be sent the kyngis comaundement serteyne squyers of hys housolde ti awayte upon them that schall bemade kynghtis and be ther servauntis and chambirleynes.

Then schall the kyngis barboure come and shave all the squyers and every squyer shall paye for his berde shavynge xx s. and every squyer schall ordeyne for his bayne xxiiij ellis of lynnyn clothe and that schall the kyngis barboure have for his fee.

Then schall the seyde squyers goo un to ther bayne and all that abillment the sergaunt of the chaundre shall have for his fee and when they be in ther bayne then schall the herawdis of armys goo un to the kynge and lete him have knowlege that the squyers bene in ther bayne. Then schall the kynge comaude the stewarde of his house with othir lordis and knyghtis for to goo un to the squyers and yeve them ther charge as they sitte in ther bayne.

Then schall the stewarde come with all the lordis and knyghtis the kyngis mynstrellis and herawdis of armys before them un to the chambir dore and then the lordis entire in to the chambir with the herawdis for to yeve them ther charge as they bene in the bayne. Saying in this wise.

Brothir the kynge oure sovereyne lorde woll that ye take this hye and worshipfull ordir up on yow the whiche I as a knyght declare un to yow certeyne poyntis that longith un to this hye and worshipfull ordir of knyghthode ye shall love god above all things and be stedfaste in the feythe and sustene the chirche and ye shall be trewe un to yowre sovereyne lorde and trewe of yowre worde and promys & sekirtee in tha to be kepte also ye schall sustene wydowe in ther right at every tyme they wol requere yow and maydenys in the virginite and help hem & socoure hem in yowre good that for lak of good they be not mysgovernyd. Also ye schall sitte I noo plase where that eny iugement schulde be gevyn wrongefully eyens eny body to yowre knowleche. Also ye schall not suffir noo murdreris nor extorcioners of the kyngis pepill with in the Contre there ye dwells but with yowre power ye schall lete doo take them and put them in the handis of Justice and that they be punysshid as the kyngis lawe woll and then ye schall putte yowre hande in to the bayne and take up watir and make a crosse up on his lyfte schuldir before and behynde and kisse it and saye in nomine pris &c God sende yow as moche worshipe as evyr had eny of yowr kynne and thus muste doo all the lordis & knyghtis un to every squyer as he sittith I the bayne.

Then they schall goo oute of ther baynes in to ther beddis and then they schall arise and make them redy in hermytis aray of Colchestir russet and the sergaunt of the kyngis chaundre schall have all the beddis the whiche bene thus arayed. A matrias a payre of blanketis a payre of shetis a Covyrlite of worstide and a clooth of golde up on that and a reed tapite of worstide at his beddis heed hyngynge ov the heed.

Than they schall goo alle to gedir in to the Chapell and bee in ther preyeris till in the mornyge un to viij of the clokke. Than they schall have amasse of the holy goste and then they schall offir a tapi and apeny strikynge in the tapir as nye the lyght as it may resonably. When masse is done then they schall goo un to ther chambris and chaunge hem and the kyngis wayte schall have all ther wacchynge garmentis.

Than they schall chaunge them in to a nothr arayment ffirste they schall putte up on them dubletis w^t blak hosis chsemles a reed code of reed tartaryn and a white ledir girdill aboute him and the gyrdill may have noo bokill. Then he muste have a white Coyfe up on his heed and then a mantell of reed tarteryn purfolk aboute with white ermyn and that muste be putte above him and a white <A Name="blaze">lase</a> muste be in the seyde mantell before at the breste with a peyre of white glovys knyt in the seyde lase.

Then the servauntis and chambirleynes that bene asynid to awayte up on them schall take ther swerdis and the skabert schall be white ledir with oute any bokill and a payre of gilte sporis hangynge up on the hiltis of the same sworde and the seyde servauntis and chambirleynes schall bere the seyde sworde with the sporis before them.

Then they schall come downe and take ther horsis and ther horsis schall be arayde in this wise. The sadill muste be blak and bordid aboute with white ledir and the bridill must be blak with a crosse of laton hyngynge in the frunte of the horse and a paytrell of the same sute and the marchall of Engelonde schall have all ther horsis for his fee.

Then they schall alyghte and come in to the kyngis presence with ther swordis borne before them and makynge ther obeysaunce. Then they schall come evy to the kynge. Then schall two knyghtis take the sporis of the sworde and doo hem on ther helis. Then schall the kynge gyrde his swoede aboute him. Then the squyer puttith him bothe his thumbis with in las of his mantell and lyftis up his armys ovyr his heed then the kynge puttith bothe his hondis with in his armys and takis him aboute the nekke with bothe his handis and kissis him and plukkis him be the nekke and sayes un to him. Sooyes bon chevalere then the knelys downe and standis by till the kynge hath made hem alle than they schall be lade un to the chapell with knyghtis.

When they come in to the chapell evyn before the hye ait then they shall ungirde him and leye his sworde up on the auter and then knele downe and ley his hande up on the aut then and deen or on for him that is asynid for to say in this wise. Be this holy aut tht oure lordis body is mynsitrid on ye schall systeyne the chirche and kepe this hye and worshipfull ordir that ye have takyn up on yowre ye s'e.

And when they be goynge oute of the chapell then schall the kyngis mayst cook mete with hem at the dore and he schall say un to hem in this wise. S' I as the kyngis mayst cook come at this tyme to lete yow have knowlege what is myne office. S'e myne office is yf ye be untrewe to yowre sovereyne lorde or doo ayens this hye and worshipfull ordir that ye have takyn myne office is that y muste smyte yowre hele be the small of yowre leggis and herefore I clayme yowre sporis the whiche I pray yow remembir this in yowre mynde and yeve yow grace to keep this hye and worshipfull ordir and yeve yow as moche worshipe as evyr had eny of yowre kynne.

Then they schall be brought in to the halle then the kynge comyth in to the halle and wasshis and is sette. Then shall all the newe made kyngtis wasshe and sitte at a side borde and when the kynge is s'vid then all the halle schall s'vid but the newe made knyghtis schall ete noo mete and when the kynge is s'vid of the laste course then the herawdes schall crye the kyngis largesse in foure plasis in the halle of the newe made knyghtis and when the kynge hath dynid. Then they schall goo in to ther chambris and doo of ther arayment and that the herwadis shall have for ther fee.

Then they shall doo up on them longe blewe gownis and it muste be prifild aboute with ermyn and a white lase of silke with golde in the toftis muste be pynid a pyn up on his lyfte schuldir and a hood of the same purfiled aboute of the shappe as becheloeris of lawe have and the hoode muste be caste aboute his nek and the hood and the tipet pynnid to gedir up on the lyfte schuldir and then theyt schall goo alle to gedir un to the kyng and when they come in to his presence on shall say for them alle in this wise. Most hye and excellent and most myghti prince oure soveryn lorde we thanke yowe of this hye and worshipfull ordir that ye have gyve un to us and we as yowre liege men schall be redy at yowre comaundement. Then they schall bowe them downe alle at onys and arise and goo ther wey then they goo in to ther chambris and chaunge hem and all these gownis and hodis the sergaunt of the kyngis Chaundre schall have for his fee. And then all the newe made knyghtis may doo what them likis for all is done and endid.